الشعور بالوحدة شيء عادي في حياتنا، وسببه الرئيسي إنك مختلف عن أي حد، وصعب تبقى متواصل مع كل الناس في كل الأوقات، لكن أحياناً الشعور بالوحدة بيتحول لأزمة، وخصوصاً في مجتمع جديد وكبير زيّّ الجامعة..
الوحدة لا تعني بالضرورة إنك (تكون لوحدك)، الشعور بالوحدة جايز، حتى في وجود ناس كتير حواليك، حتى لو كنت بتتفرج على ماتش الأهلي والزمالك في ستاد القاهرة شخصيا!!
الوحدة ببساطة هي إدراك مؤلم لكونك مش متصل بالناس، وإن احتياجاتك النفسية الأساسية مش قادر على تحقيقها لوحدك.
الوحدة بتعني إنك حاسس بإنك:
• منفصل عن المجموعة.
• غير محبوب من المحيطين.
• غريب أو شاذ عن الجو المحيط بيك.
• مش لاقي ولا واحد يشاركك مشاعرك واهتماماتك الشخصية.
• بتلاقي صعوبة في عمل صداقات والتواصل بعمق مع الآخرين.
ظلال الوحدة السلبية:
• بتعاني من عدم التوافق مع نفسك، وبتعتمد على الآخرين لعمل ده.
• لا تقوم بأي مبادرات للاشتراك في أنشطة اجتماعية، ومستني الناس تدعوك للمشاركة في أنشطتهم وحواراتهم، وبتزعل قوي لو ماعملوش ده وبتزيد وحدتك.
• دايماً مهموم وقلقان من نظرة الناس وتقييمهم ليك، سواء كانوا زملاءك أو أساتذتك.
• بتتجنب مقابلة الناس والوجود في مواقف جديدة، وبتقابلك صعوبة في تقديم نفسك للناس، والمشاركة في أي أنشطة عادية.
الخروج من ظلال الوحدة:
الخروج من الوحدة أمر بيعتمد عليك، بإعادة التوازن لنفسك والقدرة على تقديرها. لو إنت وحيد تقدر تعمل حاجة:
• ابحث عن المواقف اللي تخليك تندمج مع الناس، ابدأ حوارات أو اسأل أسئلة.
• اتعلم تكون إيجابي، لو إنت خجول حاول تقلل ده بإلقاء التحيات علي الآخرين، وعمل حوارات قصيرة، وشارك في المناقشات في قاعة المحاضرات.
• استمتع بحياتك عن طريق تنمية مهاراتك الاجتماعية.. لو قابلت شخص وشعرت بالرغبة في الكلام معاه، ماتقعدش هناك وتفضل مستني إنه ييجي ليك، قوم بالخطوة الأولى اللي ممكن التمهيد ليها عن طريق الاتصال بالعين، والسلام، والابتسام.
• شارك في الأنشطة الجامعية المختلفة، في مكتب رعاية الطلبة هتكتشف إن فيه أنشطة كتيرة ماتعرفش عنها.. رحلات، مسابقات، ندوات وغيرها.
• الناس تستحق فرص تانية، لا تحاكمهم بناء على خبراتك ومشاعرك السابقة، اتعرف عليهم أكتر واكتشف المساحات المشتركة بينكم.
• لما تكون لوحدك اتعود تشغل نفسك وتستمتع بوقتك، اقرأ، اسمع مزيكا، روح السينما، كلم الناس.. ماتخليش الوحدة تستفرد بيك.
